Янгиликлар

“Jurabek Laboratories” МЧЖ ҚК томонидан ишлаб чиқарилган ZF-UZ-VAC2001 вакцинасининг илк партияси тантанали равишда топширилди

2021-09-30 11:18
Бугун, 30 сентябрь куни, “Jurabek Laboratories” МЧЖ қўшма корхонаси томонидан ишлаб чиқарилган ZF-UZ-VAC2001 вакцинасининг 1 458 820 дозаси Ўзбекистон Республикаси Санитария-эпидемиологик осойишталик ва жамоат саломатлиги хизмати вакилларига топширилди. Ҳозирги кунда қўшма корхона томонидан жами 7 миллион доза вакцина ишлаб чиқарилган бўлиб, кейинги дозалари босқичма-босқич эмлаш пунктларига етказиб берилади. Вакцина топшириш маросимида инновацион ривожланиш вазири Иброҳим Абдураҳмонов, Санитария-эпидемиологик осойишталик хизмати бошлиғи ўринбосари Нурмат Отабеков, Фармацевтика тармоғини ривожлантириш агентлиги директорининг биринчи ўринбосари Дилшод Акбаров иштирок этди.

 “Jurabek Laboratories” МЧЖ қўшма корхонаси томонидан мазкур вакцинани ишлаб чиқариш Хитойнинг Anhui Zhifei Longcom Biopharmaceutical Co., Ltd. компанияси билан имзоланган ҳамкорлик шартномаси доирасида амалга оширилмоқда. Мазкур ишлаб чиқаришнинг ташкил этилиши Ўзбекистон ва Хитой олимлари, вирусологларининг ҳамкорлиги натижасидир. 


COVID-19га қарши ZF-UZ-VAС2001 вакцинаси Хитой Фанлар академияси Микробиология институти ҳамда Ўзбекистон Республикаси Инновацион ривожланиш вазирлиги ҳузуридаги Илғор технологиялар маркази ва Соғлиқни сақлаш вазирлиги Вирусология илмий-тадқиқот институти билан ҳамкорликда Zhifei Longcom Biopharmaceutical компанияси томонидан яратилган. Мазкур вакцина 3-фаза клиник синовлари натижаларига кўра 3-дозадан сўнг вакцинанинг самарадорлиги барча штаммлар учун умумий 81,76%, «британча» штаммга қарши эса 92,93% ташкил этди.
Препаратнинг ампула шаклини ишлаб чиқариш Anhui Zhifei Longcom Biopharmaceutical Co., Ltd. биофармацевтика корхонасида ишлаб чиқарилган вакцинанинг оригинал субстанцияси асосида амалга оширилди.