Jurabek Laboratories” MCHJ QK tomonidan ishlab chiqarilgan ZF-UZ-VAC2001 vaksinasining ilk partiyasi tantanali ravishda topshirildi

Bugun, 30 sentyabr kuni, “Jurabek Laboratories” MCHJ qo‘shma korxonasi tomonidan ishlab chiqarilgan ZF-UZ-VAC2001 vaksinasining 1 458 820 dozasi O‘zbekiston Respublikasi Sanitariya-epidemiologik osoyishtalik va jamoat salomatligi xizmati vakillariga topshirildi. Hozirgi kunda qo‘shma korxona tomonidan jami 7 million doza vaksina ishlab chiqarilgan bo‘lib, keyingi dozalari bosqichma-bosqich emlash punktlariga yetkazib beriladi. Vaksina topshirish marosimida innovatsion rivojlanish vaziri Ibrohim Abdurahmonov, Sanitariya-epidemiologik osoyishtalik xizmati boshlig‘i o‘rinbosari Nurmat Otabekov, Farmatsevtika tarmog‘ini rivojlantirish agentligi direktorining birinchi o‘rinbosari Dilshod Akbarov ishtirok etdi.

“Jurabek Laboratories” MCHJ qo‘shma korxonasi tomonidan mazkur vaksinani ishlab chiqarish Xitoyning Anhui Zhifei Longcom Biopharmaceutical Co., Ltd. kompaniyasi bilan imzolangan hamkorlik shartnomasi doirasida amalga oshirilmoqda. Mazkur ishlab chiqarishning tashkil etilishi O‘zbekiston va Xitoy olimlari, virusologlarining hamkorligi natijasidir.
COVID-19ga qarshi ZF-UZ-VAS2001 vaksinasi Xitoy Fanlar akademiyasi Mikrobiologiya instituti hamda O‘zbekiston Respublikasi Innovatsion rivojlanish vazirligi huzuridagi Ilg‘or texnologiyalar markazi va Sog‘liqni saqlash vazirligi Virusologiya ilmiy-tadqiqot instituti bilan hamkorlikda Zhifei Longcom Biopharmaceutical kompaniyasi tomonidan yaratilgan. Mazkur vaksina 3-faza klinik sinovlari natijalariga ko‘ra 3-dozadan so‘ng vaksinaning samaradorligi barcha shtammlar uchun umumiy 81,76%, “britancha” shtammga qarshi esa 92,93% tashkil etdi.

Preparatning ampula shaklini ishlab chiqarish Anhui Zhifei Longcom Biopharmaceutical Co., Ltd. biofarmatsevtika korxonasida ishlab chiqarilgan vaksinaning original substansiyasi asosida amalga oshirildi.